Mannauðsstefna Sýnar

Með kaupum Sýnar á Já á árinu fylgdi öflugur hópur starfsfólks sem nú hefur flust inn í höfuðstöðvar félagsins á Suðurlandsbraut. Starfsfólk Já er frábær viðbót við starfsmannaflóru félagsins og ljóst að í þeirra röðum er mikil sérþekking sem mun nýtast vel í þeim verkefnum sem framundan eru.

Jafnrétti og mannréttindi er liður í mannauðsstefnu Sýnar og er áhersla lögð á að allt starfsfólk sé metið að verðleikum, njóti jafnra tækifæra á vinnustaðnum og hugað er að inngildingu.

Á árinu hlaut Sýn viðurkenningu Jafnvægisvogar FKA en markmið hennar er að vera hreyfiafl til að auka jafnvægi kynjanna í efstu lögum skipulagsheilda.

Sýn hefur statt og stöðugt unnið að því að skapa vinnuumhverfi sem hvetur til fjölbreytni og jafnréttis. Við vitum að árangur í jafnréttismálum er ekki eitthvað sem gerist af sjálfu sér heldur er það ákvörðun sem við erum stolt af að hafa tekið. Við munum halda áfram að leita leiða til að tryggja fjölbreytileika og inngildingu bæði í hópi stjórnenda og starfsfólks og er þessi viðurkenning okkur mikil hvatning að halda þeirri vegferð áfram.

Félagið fékk einnig endurvottun á Jafnlaunastaðli ÍST85 í árslok 2023 en sameinað félag hefur verið með jafnlaunavottun síðan árið 2019 og Vodafone síðan 2017. Til stendur að uppfæra jafnlaunakerfi Sýnar á árinu 2024 og aðlaga að breyttu skipulagi félagsins.

UNI er regnhlífarhugtak sem nær yfir allt fræðslustarf innan Sýnar. Með UNI vill félagið tryggja góða og samræmda grunnþjálfun starfsfólks um leið og félagið veitir starfsfólki sérhæfða þjálfun og fræðslu sem hentar starfi hvers og eins.

Því til viðbótar býður UNI reglulega upp á gagnleg námskeið og fyrirlestra sem eflir starfsfólk bæði í leik og starfi.

Sérstök áhersla var lögð á stjórnendaþjálfun á árinu sem fór að mestu leyti fram innanhúss. Boðið var upp á fjölda námskeiða og vinnustofa þar sem markvisst var unnið að því að efla stjórnendur og gera þá sjálfbærari þegar kemur að mannauðsmálum. Þá var einnig staðið fyrir vandaðri EKKO fræðslu eða fræðslu um einelti, kynferðislega áreitni, kynbundna áreitni og ofbeldi, en fyrirtækið leggur ríka áherslu á að vel sé staðið að slíkum málum.

Mikið er lagt upp úr góðum anda á vinnustaðnum, jákvæðum samskiptum og því að hafa gaman í vinnunni. Vinnustaðamenningin einkennist af drifkrafti og frumkvæði, boðleiðir eru stuttar og starfsfólk hjálpast að við að ná settum markmiðum.

Innan fyrirtækisins starfar starfsmannafélagið Stýna, sem stendur reglulega fyrir viðburðum fyrir starfsfólk og fjölskyldur þeirra en auk þess eru fjölmargir klúbbar starfræktir á meðal starfsfólks til dæmis hjólahópur, hlaupahópur, royalistafélag og gönguhópur svo fátt eitt sé nefnt.